Spölur - Hvalfjarðargöng

Umferð í Hvalfjarðargöngum dróst saman um ríflega 17% í nýliðnum janúar miðað við sama mánuð í fyrra. Þetta er mesti samdráttur í einum mánuði sem mælst hefur eftir efnahagshrunið.

 Það liggur með öðrum orðum fyrir að rétt tæplega 20.000 færri bílar fóru um göngin í janúar í ár en í janúar í fyrra, sem jafngildir 640 bílum færri bílum á sólarhring að jafnaði.

Augljóst er að rysjótt tíð í janúar síðastliðnum setti verulegt strik í reikninginn í umferðinni en tæplega skýrir hún samt söguna alla í göngunum. Líklegt er að þar megi leggja saman áhrif slæms tíðarfars og eldsneytisverðs í hæstu hæðum.

Vegagerðin birti í dag sinar mánaðarlegu upplýsingar um umferð á þjóðvegum landsins og þar kemur fram að samdráttur í janúar síðastliðnum hafi numið ríflega 10%. Meiri samdráttur hefur ekki mælst frá einum janúarmánuði til annars frá því byrjað var að safna samanburðarhæfum upplýsingum af þessu tagi hjá Vegagerðinni. Umferð á öllum svæðum landsins dróst saman, mest á Suðurlandi eða um 21%, minnst á Norðurlandi eða um ríflega 5%.

Athyglisvert verður að fylgjast með umferðartölum í febrúar og mars til að sjá hvort janúar hafi gefið vísbendingu um hvað koma skuli í umferðini í ár.

Sömuleiðis verður fróðlegt að sjá tölur alls ársins 2012 í ljósi niðurstaða nýrrar könnunar Vegagerðinnar sem leiðir í ljós afar sterka fylgni aksturs landsmanna annars vegar og hagvaxtar (vergrar landsframleiðslu) hins vegar.

Það reynist hvorki meira né minna en 96% fylgni milli vergrar landsframleiðslu og aksturs á landinu frá 1975 til 2010. Umferðin jókst þannig um 3,8% 1975-2010 og verg landsframleiðsla jókst um 3% á sama árabili.

Taflan: fjöldi bíla í mánuði í göngunum. Í neðstu línu er hlutfallsleg breyting í hverjum mánuði 2012 miðað við sama mánuð 2011.